அன்னை ஆயிஷாவின் அறிவுக்கூர்மை

எல்லாப் புகழும் அல்லாஹ் ஒருவனுக்கே.              

ஒரு வரலாற்றைப் படிக்கும்போது அதிலிருந்து தெரிந்துகொள்ளவேண்டிய விஷயங்கள் பல இருக்கும். அதைப்போல அவ்வரலாற்றிலிருந்து நாம் புரிந்துகொள்ளவேண்டிய விஷயங்களும் சில இருக்கும். வரலாறு கற்றுத்தரும் பாடம் என்பது அதுதான்.

மின்சார பல்பை எடிசன் கண்டுபிடித்தார் என்பது அவரது வாழ்க்கை வரலாற்றிலிருந்து நாம் எல்லோருமே தெரிந்துகொள்ளும் ஒரு தகவலாகும். பல்லாயிரம் முறைகள் முயற்சி செய்தபோதும் அவருக்குத் தோல்வியே கிடைத்தது, ஆனாலும் அவர் விடவில்லை, அவரது விடா முயற்சியே அவருக்கு இறுதியில் வெற்றியைக் கொடுத்தது என்பதுதான் நாம் புரிந்துகொள்ள வேண்டிய செய்தியாகும். இஸ்லாமிய வரலாற்றைப் படிக்கும்போதும் நமக்கு இந்த உன்னிப்பான பார்வை தேவை.  அன்னை ஆயிஷா அவர்களைப் பற்றிய சில நூல்களைப் படித்துக்கொண்டிருந்தபோது எனக்குப் புரிந்ததும் இதுதான்.

அன்னை கதீஜா அவர்களுக்குப் பிறகு, இறுதித்தூதர் அவர்கள் மணந்துகொண்ட பெண்களில் வயது மிகக்குறைந்தவராக இருந்தவர் அன்னை ஆயிஷா அவர்கள்தான். ஆனால் மற்ற வயது முதிர்ந்த மனைவிமார்களிடம் இல்லாத அளவுக்கு அறிவுக்கூர்மையும், ஆழமான மார்க்க ஞானமும் அன்னைஆயிஷா அவர்களிடம் இருந்தது அவர்களது சிறப்புக்களில் ஒன்றாகும்.

உண்மையை சொல்லத் தயங்காத துணிச்சல் கொண்டவர் அவர் என்பதை வரலாறு தெளிவாகக் காட்டுகிறது. அன்னை ஆயிஷாமீது அவதூறு சொல்லப்பட்டபோது, உண்மையை அறிய பெருமானார் பெருமுயற்சிகள் எடுத்துக்கொண்டிருந்தார்கள். ஆனாலும் மனைவியை தாய் வீட்டில்தான் விட்டு வைத்திருந்தார்கள். இறைவன் ஒரு வஹீ மூலம் அன்னை ஆயிஷா தூய்மையானவர் என்பதை உலக்குக்கு அறிவித்தான் (சூரா நூர் 24: 23).

அந்த செய்தியை அறிந்ததும் ஆயிஷா அவர்களின் அன்னையார், ‘மகளே, நீ தூய்மையானவள் என்பதை இறைவனே வஹீ மூலம் அறிவித்துவிட்டான். எழுந்து வந்து இறைவனின் தூதரான உன் கணவருக்கு நன்றி சொல்’ என்று சொன்னபோது, ‘என்னுடைய இறைவனைத் தவிர வேறு யாருக்கும் நான் நன்றிக்கடன் பட்டவள் அல்ல’ என்று சொல்லிய துணிச்சலும் நேர்மையும் அன்னை ஆயிஷாவுக்கே உரியது!

ஒரு பிரபலமான நபிமொழிக்கு அன்னை ஆயிஷா கொடுத்த விளக்கமானது அவர்களது அறிவுக்கூர்மையை உலகுக்கு எடுத்தோம்புவதாக உள்ளது.

இறந்த ஒருவரின் உடலை வைத்துக்கொண்டு அவரது உறவினர்கள் உரத்த குரலில் ஒப்பாரி வைப்பதால் இறந்தவருக்கு தண்டனை அளிக்கப்படுகிறது என்ற நபிமொழி பிரபலமானது. உமர் இப்னு கத்தாப், அப்துல்லாஹ் இப்னு அப்பாஸ், அப்துல்லாஹ் இப்னு உமர், அல் முகீரா, ஷு’அபா போன்ற நபித்தோழர்கள் மூலமாக இந்த நபிமொழி திரும்பத்திரும்ப சொல்லப்பட்டுள்ளது.

ஆனால் பெருமானார் ஒருபோதும் இப்படிச்சொல்லவில்லை என்று அன்னை ஆயிஷா திட்டவட்டமாக அதை மறுத்தார்கள். உண்மையில் நடந்தது என்னவெனில், ஒருநாள் பெருமானார் ஒரு யூதரின் ஜனாஸாவைக் கடந்து சென்றார்கள். அவரது உறவினர்கள் உரத்த குரலில் அவருக்காக ஒப்பாரி வைத்துப் புலம்பிக்கொண்டிருந்தார்கள். அதைப்பார்த்த பெருமானார், ‘இவர்கள் இங்கே அழுதுகொண்டிருக்கிறார்கள். ஆனால் அவருக்கோ அங்கே தண்டனை கொடுக்கப்படுகிறது’ என்று கூறினார்கள்.

இறந்த ஒருவருக்காக மற்றவர்கள் அழுவது இறந்தவரின் தண்டனைக்குக் காரணமாக அமையாது. ஏனெனில் இரண்டும் இருவேறு தனித்தனி நிகழ்வுகள். ஒருவர் இறந்துவிட்டாரே என்பதற்காக அவரது உறவினர் அழுகிறார்கள். இறந்தவரோ அவரது செயல்களின் விளவுகளுக்கேற்ப தண்டிக்கப்படுகிறார். ஒருவருடைய செயலுக்கு இன்னொருவருக்கு எப்படி தண்டனை கொடுக்கப்படும்?  ஒரு ஆன்மாவின் சுமையை இன்னொரு ஆன்மா சுமக்காது என்று திருமறை மிகத்தெளிவாகக் கூறுகிறது (சூரா அன்’ஆம் 6:164). மேற்கூறப்பட்ட நபிமொழிக்கான தவறான விளக்கத்தை மறுக்கும் விதத்தில் இந்த திருமறை வசனத்தை அன்னை ஆயிஷாவே மேற்கோள் காட்டினார்கள். 

அழுவதற்கு அனுமதியுண்டு. ஏனெனில் அது அன்பின் உச்சகட்ட வெளிப்பாடாகும். பெருமானார் எத்தனையோ தடவைகள் அழுதுள்ளார்கள் என்பதை வரலாறும் நபிமொழிகளும் காட்டுகின்றன. ஆனால் அழுவதற்குப் பதிலாக, ஆடைகளைக் கிழித்துக்கொள்வது, கன்னத்தில் அறைந்துகொள்வது, தலையில் மண்ணை அள்ளிப் போட்டுக்கொள்வது, உரத்த குரலில் ஒப்பாரி வைப்பது போன்ற இஸ்லாமிய சட்டத்தால் அங்கீகரிக்கப்படாத செயல்களைச் செய்வது விரும்பத்தக்கதல்ல. அப்படியெல்லாம் செய்பவர்கள் அறியாமைக்காலத்து மக்களைப் போன்றவர்கள் என்றும், நம்மைச் சேர்ந்தவர்கள் அல்ல என்றும் பெருமானார் கூறியுள்ளார்கள்.

அப்படியானால் உமர் அவர்கள், அல் முகீரா, ஷு’அபா, அப்துல்லாஹ் இப்னு உமர் போன்ற நபித்தோழர்கள் மூலமாக இவ்விஷயம் பற்றி திரும்பத்திரும்ப சொல்லப்பட்ட பல நபிமொழிகளை எப்படி எடுத்துக்கொள்வது?

எப்படிப் பார்த்தாலும் அன்னை ஆயிஷா கொடுத்த விளக்கத்தைத்தான் எடுத்துக்கொள்ள வேண்டியுள்ளது. ஏனெனில் அவர்கள் பெருமானாரால் மிக அதிகமாக நேசிக்கப்பட்ட, பெருமானாரோடு வாழ்க்கையைப் பங்கு போட்டுக்கொண்ட அருமை மனைவியாவார்கள். அவர்களோடு இருக்கும்போது பெருமானாருக்கு வஹீ வந்துள்ளது. அவர்கள் மடியில்தான் பெருமானாரின் உயிர் பிரிந்தது.

இவ்வகையான காரணங்களுக்காக மற்றவர்களுக்குக் கொடுக்க முடியாத நம்பகத்தன்மையை அன்னை ஆயிஷாவுக்குக் கொடுக்கவேண்டும் என்று சொல்வது சரியாகாது. ஆனால் மற்றவர்களைவிட பெருமானாரை அதிகம் அறிந்தவர்களாக அன்னை ஆயிஷா இருந்தார்கள். அவர்களுக்கு பெருமானாரோடு இருந்த நெருக்கமானது உடலில் தொடங்கி உடலில் முடிந்த நெருக்கமல்ல. அது உள்ளத்தையும் தாண்டி ஆன்மாவோடு தொடர்பு கொண்டது.

அவர்களது விளக்கத்தில் ஓர் அதிகார முத்திரை உள்ளது. சில சமயங்களில் நபிமொழியை சரியாகப் புரிந்துகொள்ளாமல் மற்றவர்களுக்குச் சொன்னதற்காக நபித்தோழர் அபூ ஹுரைரா அவர்களை அன்னை ஆயிஷா கடிந்துகொண்டுள்ளார்கள்!

எனவே, இறந்தவருக்காக ஒப்பாரி வைத்தால் இறந்தவர் தண்டிக்கப்படுவார் என்ற நபிமொழியை, அட ஆண்டவனே, இப்படியெல்லாம் ஆகிவிடுமோ என்று அஞ்சி ஒப்பாரி வைப்பதை உளவியல் ரீதியாகத் தடுக்கும் ஒரு வழியாக வேண்டுமானால் ஏற்றுக்கொள்ளலாம்.

பெண், வாகனம், வீடு ஆகிய மூன்று விஷயங்களில் துர்ச்சகுனம் உள்ளது என்று பெருமானார் சொன்னதாக நபித்தோழர் அபூ ஹுரைரா அறிவிக்கிறார் என ஒரு செய்தி அன்னை ஆயிஷாவின் கவனத்துக்குக் கொண்டுபோகப்பட்டது.

அது உண்மையல்ல, அபூ ஹுரைரா பாதி நபிமொழியைத்தான் கேட்டார், மீதியைக் கேட்கவில்லை, பாதியைப் பெருமானார் கூறி முடித்தவுடன்தான் அவர் வந்தார், அதை மட்டும் கேட்டுவிட்டு அதை அறிவித்துவிட்டார், அது சரியல்ல என்று அன்னை ஆயிஷா சொன்னார்கள்.

முழுமையான நபிமொழி என்னவெனில், ‘பெண், வாகனம், வீடு ஆகிய மூன்று விஷயங்களில் துர்ச்சகுனம் உள்ளது என்று யூதர்கள் கருதிக்கொண்டிருந்தார்கள்’ என்பதுதான் என்று அன்னை ஆயிஷா விளக்கம் சொன்னார்கள்!

நபித்தோழர் அபூ சயீத் குத்ரி அவர்கள் இறக்கும் தருவாயில் ஒரு புதிய ஆடையைத் தருவித்து அணிந்துகொண்டார். ஓர் இறைநம்பிக்கையாளன், இறைவனுக்குக் கீழ்ப்படிந்து வாழ்கின்ற ஒரு முஸ்லிம், எந்த உடையில் இறக்கிறானோ அதே உடையில் எழுப்பப்படுவான் என்று அதற்குக் காரணமும் சொன்னார்.

அதைக்கேட்ட அன்னை ஆயிஷா, ‘அல்லாஹ் அபூ சயீத் மீது அருள் மழை பொழியட்டும். ஆடைகள் என்று அண்ணலார் சொன்னது ஒருவரது நற்செயல்களைத்தான்’ என்று விளக்கினார்! எந்த நபிமொழி சாதாரணமானது, எது குறியீட்டுத் தன்மை கொண்டது என்று ஐயமறப் புரிந்துகொண்டு அறிவித்தவர்கள் அன்னை ஆயிஷா. உணவு வகைகளில் ’தரீத்’ அல்லது ‘ஸரீத்’ எப்படி உயர்வானதோ அதைப்போல பெண்களில் எனக்கு ஆயிஷா’ என்று பெருமானார் சொன்னதன் பின்னால் எவ்வளவு அர்த்தம் உள்ளது என்பதற்கு அன்னை ஆயிஷாவின் அறிவுக்கூர்மையே சான்றாகும்.

About நாகூர் ரூமி

A spiritualist and a writer.
This entry was posted in Articles /கட்டுரை. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s